fbpx

Запознај ги психолозите зад екраните: Билјана Стојановска

Билјана Стојановска

Разговор.мк е платформа која овозможува анонимен пристап до лиценцирани психолози. На платформата можете да изберете некој од нашите 40+ професионалци за ментално здравје и анонимно да се допишувате или пак да имате аудио/видео разговор. Со цел подобро да ги запознаете психолозите, им поставивме неколку кратки прашања на кои тие одговорија. Денес разговараме со Билјана Стојановска.

За својата биографија Билјана Стојановска вели:

Јас сум Билјана Стојановска, дипломиран, лиценциран психолог и магистер по психолошки науки од областа на Организациска психологија и психологија на труд. Советник психотерапевт по Интегративна психотерапија и Гешталт психотерапевт под супервизија. Покрај тоа сум сертифициран психодијагностичар, сертифициран советник за LGBTI+ лица, како и советник за психо-физичко здравје со терапевтско делување во Интегративна медицина.

Основач сум и претседател на ЕСТЕЗИА-Центар за интегративен развој, советување и едукација, каде ја извршувам мојата приватна пракса. Три години бев претседател на координативно тело на секција на психолози за човечки ресурси, менаџмент, проценка и развој на вработени. Актуелно сум во процес на едукација за NLP Practitioner. Имам работно искуство 19 години, од кои 11 години во областа на психолошко советување и психодијагностика, преку индивидуална и групна работа со деца, адолесценти и возрасни, поединци и организации.

Воедно, 10 години работев со деца и адолесценти во социјален ризик. Работејќи во различни установи, како: Психијатриска болница, Централен затвор, Центар за зависности, Центар за стерилитет и сексуални проблеми, Установа за згрижување на деца и младинци без родители и родителска грижа и соработката со различни организации и здруженија, имав можност, покрај наведеното образование, да завршам многубројни обуки од различни тематики, како и да стекнам искуство во работа со различни возрасти и проблематики.

За пристапот во својата работа Билјана Стојановска вели:

Во работата со деца, адолесценти и возрасни користам интегративен пристап на работа, односно опфаќање на сите три аспекти од личноста на клиентот: тело, душа и дух. Секако, притоа земјаќи го во предвид и контекстот на индивидуалноста на клиентот (вредности, значења, ставови, потреби и цели), со цел подобрување на психофизичкото, социјалното и емоционалното функционирање.

Техниките и методите за работа кои ги користам се од областите на: Интегративна психотерапија, Гешталт психотерапија, Организациска психологија, Интегративна медицина и Психодијагностика. Дополнително ги користам и знаењата стекнати низ искуството и праксата, како и од семинарите, обуките и едукациите кои дополнително сум ги завршила, за работа со различни медицински состојби, судски случаи, психијатриски заболувања, зависности, развојни нарушувања и нарушувања во однесувањето кај деца и адолесценти, карактерни стилови и релации, трговија со луѓе, работа со ХИВ позитивни лица итн. Особен фокус на интерес ми е поврзаноста помеѓу трите аспекти на личноста (тело, душа и дух) и нивното меѓусебно влијание и добросостојба, како и терапијата насочена кон емоции, опфаќајќи различни типови на емотивни врски и состојби.

Зошто станавте психолог/психотерапевт/советувач?

Одлуката сметам дека еволуираше во мене. Најпрво во детството често си поставував прашања кои се причините што предизвикуваат различни луѓе да се однесуваат различно во исти ситуации и слично. Кога почнав да работам на 18 години како медицинска сестра во Психијатриска болница, секое слободно време го користев во разгледување на работата на клиничките психолози и разгледување на психолошките наоди. Едноставно знаев која е мојата професионална дестинација. Потоа уживав во патувањето и собирањето на искуство и знаење.

Што ве мотивира да работите секој ден?

Гледањето на повисоката цел: Правам нешто што посредно им помага на другите да се чувствуваат добро и да функционираат подобро.

Кои промени сакате да ги видите или направите поврзани со менталното здравје во општеството?

Да се разбере дека менталното здравје е подеднакво важно како телесното и духовното. Верувам дека постои и ментален и духовен имунитет, како и физички и дека сите три се поврзани.

Како вие ја дефинирате грижата за менталното здравје?

Како лична одговорност и благодарност. Додека сме живи во ред е да сме и благодарни за тоа и да посветиме грижа и внимание на тој дар наречен живот. Благодарноста е основа за среќата.

Што се надевате дека вашите клиенти добиваат од советувањето или психотерапијата?

Прифаќање, неосудување, искреност, човечност и безбедно заедничко разгледување и експериментирање на различни перспективи.

Со какви предизвици поврзани со ментално здравје најмногу сакате да работите и зошто?

Различни се предизвиците со кои повеќе сакам да работам, но би ги издвоила: работа со депресија и справување со загуба. Сакам да го гледам враќањето на надежта низ процесот и прифаќањето на тагата како една емоција која е дел од виножитото на емоции кое сите го имаме, а тоа значи дека имаме уште многу. Потоа се проблемите кои во коренот ја содржат и дискиминацијата по било која основа, затоа што секој има подеднакво право да биде среќен. Ова е пошироко поле и има уште многу да се каже.

Трета категорија која сакам да ја работам е секако работа со деца и адолесценти. Затоа што детството е најубавиот период од животот и сите имаме одговорност да придонесеме децата да имаат среќно детство. Адолесцентите затоа што едноставно вистински ги разбирам и можам да ги видам индивидуалните капацитети и да ги насочам и самите да ги видат. Особено ја почитувам довербата која ја стекнуваат, што е според мене клучна за промени и развој низ процесот.

Што правите во слободно време?

Истражувам и читам за менталното здравје, сакам да ја истражувам и експериментирам и со музикотерапијата. Сакам природа и викендите на планина или покрај езеро ме полнат со енергија.  Често барам нови места и интересни села, се радувам на пролетта, затоа што почесто е добро времето за пикник.

Ако мора да дадете само 1 совет за луѓето кои бараат психотерапија или советување, кој совет би го дале?

Сите порано или подоцна ќе се соочиме со различни кризи и предизвици. Сосема е во ред да се побара поддршка. А и сосема е во ред да се грижиме за личниот развој на секое поле: ментално, телесно, емоционално, социјално, духовно итн.

Разговор.мк мобилна апликација

За да дознаете повеќе за Билјана Стојановска и да прочитате повеќе за нејзиното работно искуство, рецензиите од претходните клиенти, достапните термини и цените за разговор преземете ја нашата мобилна апликација со клик на сликата подолу. Откако ќе се најавите анонимно, ќе бидете пренасочени кон самиот профил на психологот.